Mar phàirt de Sheachdain na Gàidhlig, thìll Mòrgan MacLeòid, a tha ag obair aig Aonad Ioma-Mheadhan Chomhairle nan Eilean Siar, chun na seann sgoile aige ann an Lìonal, Nis. Choinnich e ris na sgoilearan ‘s bhruidhinn e mu dhreuchd, mar a tha e a’ cleachdadh Gàidhlig na chuid obrach agus fhuair na sgoilearan cothrom feuchainn air cuid den obair anns a bheil e an-sàs bho làtha gu làtha.

Rinn Mòrgan ceum ann an coimpiutaireachd aig Oilthigh Ghlaschu ‘s aig an àm sin, cha robh e a’ smaoineachadh gum biodh a’ Ghàidhlig cudromach dha na chuid obrach. Ach, tha e a-nis deònach aideachadh gun robh e fada ceàrr. Tha e ag ràdh gu bheil a bhith a’ bruidhinn na Gàidhlig na bhuannachd mhòr dha, agus tha e fhathast a’ leasachadh a chuid sgilean sa chànan gach latha.

 

Thuirt Morgan:

”Bha e na thlachd a bhith a’ tilleadh dhan t-seann sgoil agam. Nuair a bha mi san oilthigh, cha robh mi cìnnteach dè an fheum a dhèanadh Gàidhlig dhomh. Ach a-nis, tha mi faicinn gu soilleir cho cudromach ’s a tha i – tha i air mo chuideachadh nam chuid obrach agus tha cothroman air leth a’ tighinn à bhith  ga cleachdadh an luib sgilean teicnigeach.”

Chòrd an latha ris na sgoilearan, a fhuair cothrom faicinn mar a ghabhas a’ Ghàidhlig cleachdadh ann an obair nam meadhanan didsiteach agus mar a dh’fhaodas i iad fhèin a chuideachadh san àm ri teachd.